Üsere Migg ischt en tolle Maa,
derig möst me no en Huffe haa!
Wa-n-er aagschieret, häd Beschtand,
da gsiet me etz im Appezellerland.

Im Reechtobel häd er mit vill Pfupf
e tolli Beiz heregschtellt: de Gupf!
Ond früener häd er im Sennwald agiert,
häd dött Ondernehmertum praktiziert,
sini Büromöbel vo beschter Qualität
hand ali wele: Firmene ond o privat!
Sini Devise isch zuepacke gsii ond schaffe
Ond nöd blööterle, lafere ond ommegaffe!

Etz aber wiiter im Text, zrugg is Dörfli Rehetobel,
wo öppe-n-ann gseid häd, de Migg häd en Vogel,
wos vo de Plän für s Dorfhus erfahre hand.
„Wa, en tüüre Neubau? Dä fahrt doch a d Wand!
E neui Wiertschaft, da ka nie funkzioniere,
de Eberle wierd si überlupfe ond ruiniere!“
E so hand d Kröömerseele die Sach kommentiert,
Lüüt, wo iererlebtig no nie näbis hand risgiert!

Ond etz schtohds s Dorfhus do, e glungni Beiz,
e Wirtschaft samt Hotel miteme bsonderege Reiz!
Wunderbar iigricht mit edlem Material,
alls anders als billegi Waar, seb wär fatal.
Jede Bünzli mos hütt zuegee: Da Hus häd Schtiil,
ond etz kond Miggs Perneri, d Sila, is Schpiil…

Bim Iirichte häd si s Zepter übernoh,
gell Migg, do momme dFraue mache loo!
D Lokalitäte begeischterid ali, alt ond jung,
ond Silas Iisatz züügt vo Gschpüür ond Schwung!
Mitenand hands am gliiche Sääli zoge,
ond klar, sönd debii öppe Fetze gfloge.
Nächtelang sönds am gueti Lösege sueche gsii,
ond d Resultat hands gfiiret miteme Gläsli Wii.
Meh wott i etz uf kann Fall veroote,
d Hoptsach isch: S Dorfhus isch groote!

Hütt haltet üsere verdiente Jubilar
Rückschau uf volli föfedachzg Johr.
Uusruebe, d Zitt verplampe ond gär nüt me too?
Sicher nöd de Migg, dä mosme wiiter mache loo.
Ond etz e Wörtli a die, wo all e Tommi hand
(die gids halt leider überall, im ganze Land):
„Ier Niider, statt drischnore ond kritisiere,
afach emol danke säge ond eschtimieren,
as s kli Reechtobel o emol ka grooss brilliere!
Merkid eu da guet, ier eewige Nörgeler,
ier kliikarierte Biomüesli-Zmörgeler!“

Zum Schluss wünschi: Migg, bliib im Saft,
bliib wiiter volle gueti Ideä ond Kraft!
Ond no näbis: En guete Root
ha-n-i zum Schluss für die parat:
Los uf d Sila, wenn si seid: Halt, schüüss nöd drii!
Nomol drüber pfuuse, si wott jo no s Bescht für dii!

Ond etz wierd aagschtosse uf üsere Jubilar:
„Migg, dis Lebenswerk ischt afach wunderbar!“

Mit besten Wünschen: Peter Eggenberger
(September 2021)